جِن کو شکوہ تھا کہ اُن سے رابطہ کوئی نہیں

اُن کو مجھ سے کچھ دنوں سے واسطہ کوئی نہیں

ہر کِسی کو چاہیئے تازہ ہوا اِس حبس میں

بند دروازوں کو لیکن کھولتا کوئی نہیں

پاؤں کی ایڑی کے نیچے کیوں چھپے جاتے ہیں سب

یوں تو کہِنے کو یہاں پر رینگتا کوئی نہیں

کر تو بیٹھے ہیں ولایت کا وہ دعوٰی زعُم میں

ہاتھ میں اُنکے بھی لیکن معجزہ کوئی نہیں

ہر کِسی کی ہے یہ خواہش کہ سُنیں اُسکو سبھی

بول تو سب ہی رہے ہیں سوچتا کوئی نہیں

بِک رہا ہے کس طرح انصاف بے بھاؤ یہاں

دیکھ تو ہم سب رہے ہیں بولتا کوئی نہیں

پھر سے منڈی لگ گئی ہے، فیصلہ ہونے کو ہے

بِکنے کو تیار سب ہیں، تولتا کوئی نہیں

محتسب کے جھوٹ پر ہے رقص میں سارا شہر

میرے ننگے سچ کو لیکن دیکھتا کوئی نہیں

اُسکی تاریکی بھی اُسکے حُسن کا اِک جزو ہے

چاند سے روشن کئی ہیں، چاند سا کوئی نہیں

ناز تھا جِن کو قبائے منصفی پہ کل تلک

وہ برہنہ ہو گئے ہیں، دیکھتا کوئی نہیں

وادیاں، کہسار، جھرنے، آبشاریں اور ہوا

خطۂ ارضی حؔسن کشمیر سا کوئی نہیں

Jin ko shikwa tha ke unn se raabta koi nahi
Unn ko mujh se kuch dinon se waasta koi nahi
Har kisi ko chahiye taaza hawaa iss habs mein
Band darwazoun ko lekin kholta koi nahi
Paoun ki airee ke neechay kyun chupay jatay hain sab
Yun tou kehnay ko yahan par reengta koi nahi
Kar tou baithay hain wilaayat ka woh dawaa zo’am mein
Haath mein unn ke bhi lekin maujaza koi nahi
Har kisi ki hai yeh khwahish ke sunain uss ko sabhi
Bol tou sab he rahay hain, sochta koi nahi
Bik raha hai kis tarha insaaf bay bahou yahan
Daikh tou hum sab rahay hain, bolta koi nahi
Phir se manddi lag gaye hai, faisla honay ko hai
Biknay ko tayyar sab hain, toulta koi nahi
Mohtasib ke jhoot par hai raqs mein saara shehr
Meray nangay sach ko lekin daikhta koi nahi
Uss ki tareeki bhi uss ke husn ka ik juzv hai
Chaand se roshan kaiee hain, chaand sa koi nahi
Naaz tha jin ko qaba-e-munsafi pe kal talak
Woh barhana ho gaye hain, daikhta koi nahi
Waadiyaan, kohsaar, jharnay, aabshaarain aur hawaa
Khitta-e-arzee Hasan Kashmir sa koi nahi